ನ್ಯೂಸ್ ಆ್ಯರೋ : ಯಮಹಾ ಕಂಪನಿಯು ಹೊಸ ಜನ್ RX 100 ಅನ್ನು ಮರುಪ್ರಾರಂಭಿಸಲು ಚಿಂತಿಸಿದ್ದು, ಈ ಬಾರಿ ದೊಡ್ಡ ಎಂಜಿನ್‌ನೊಂದಿಗೆ ಮಾರುಕಟ್ಟೆಯನ್ನು ಪ್ರವೇಶಿಸಲಿದೆ. ಈ ಹಿಂದೆ ಇದ್ದ 2-ಸ್ಟ್ರೋಕ್ ಎಂಜಿನ್ ಕೆಲ ಮಾನದಂಡಗಳ ಕಾರಣ ಸ್ಥಗಿತಗೊಂಡಿತ್ತು.
ದೇಶದ ಗ್ರಾಹಕರನ್ನು ಸೆಳೆದಿರುವ ಮೋಟರ್ ಸೈಕಲ್ ಎಂದರೆ ಅದು ಕೇವಲ RX100 ಮಾತ್ರ. ಹೌದು, RD350 ಅಸ್ತಿತ್ವದಲ್ಲಿದ್ದರೂ ವ್ಯಾಪಕ ಶ್ರೇಣಿಯ ಗ್ರಾಹಕರು ಈ ಬೈಕನ್ನು ಅಷ್ಟಾಗಿ ಖರೀದಿಸಲಿಲ್ಲ. ಏಕೆಂದರೆ ಯಮಹಾ RX100 ಮೋಟಾರ್‌ ಸೈಕಲ್ ಅಷ್ಟರ ಮಟ್ಟಿಗೆ ಭಾರತೀಯ ಗ್ರಾಹಕರನ್ನು ಕಟ್ಟಿಹಾಕಿತ್ತು. 2-ಸ್ಟ್ರೋಕ್ ಎಂಜಿನ್ ವಿಭಾಗಕ್ಕೆ ಬಂದಾಗ RX100 ಚಾಂಪಿಯನ್ ಆಗಿತ್ತು. ಯಮಹಾ ಇನ್ನೂ ಕೂಡ ತನ್ನ ಬಿಡಿಭಾಗಗಳನ್ನು ಒದಗಿಸುವ ಮೂಲಕ ಇಂದಿಗೂ ತನ್ನ ಉಳಿವನ್ನು ಭದ್ರವಾಗಿಸಿಕೊಂಡಿದೆ.
ಇಂದಿಗೂ ಕ್ರೇಜ್ ಉಳಿಸಿಕೊಂಡಿರುವ ಯಮಹಾ RX100
2-ಸ್ಟ್ರೋಕ್ ಐಕಾನ್ ಆಗಿದ್ದರೂ, ಭಾರತದಿಂದ ಸ್ಥಗಿತಗೊಳ್ಳಬೇಕಾಯಿತು. ಅದರ 2-ಸ್ಟ್ರೋಕ್ ಎಂಜಿನ್‌ನಿಂದಾಗಿ, 100cc ಎಂಜಿನ್‌ಗಳಿಗೆ ಸಂಬಂಧಿಸಿದಂತೆ ಇದು ಅವಾಸ್ತವಿಕ ಕಾರ್ಯಕ್ಷಮತೆಯನ್ನು ಹೊಂದಿರುವುದು ಎಲ್ಲರಿಗೂ ತಿಳಿದಿರುವ ವಿಷಯ. ಸವಾರಿ ಮಾಡುವಾಗ ಅದರ ಪರ್ಫಾಮೆನ್ಸ್ ಹಾಗೂ ಧ್ವನಿಯು ಸಂಪೂರ್ಣ ಬ್ಲಾಸ್ಟ್ ಮಾಡುತ್ತದೆ. ಇದೇ ಕಾರಣಕ್ಕೆ ಭಾರತದಲ್ಲಿ RX100 ಸ್ಥಗಿತಗೊಂಡು ದಶಕಗಳು ಕಳೆದರೂ ಕ್ರೇಜ್ ಮಾತ್ರ ಇಂದಿಗೂ ಜೀವಂತವಾಗಿದೆ. ಭಾರತದಲ್ಲಿ ಪ್ರಸ್ತುತ ಹಲವು RX100 ಬೈಕ್‌ಗಳನ್ನು ಇಂದಿಗೂ ಕಾಣಬಹುದು.
ಹೊಸತನೊಂದಿಗೆ ಬರಲಿದೆ ಯಮಹಾ RX100
ಆ ಕಿಡಿಯನ್ನು ಮತ್ತೆ ಹೊತ್ತಿಸುತ್ತ ಯಮಹಾ ಇಂಡಿಯಾ ಚೇರ್ಮನ್, ಈಶಿನ್ ಚಿಹಾನಾ RX100 ಪುನರಾಗಮನ ಮಾಡುತ್ತಿದೆ ಎಂದು ಮೊದಲು ಬಹಿರಂಗಪಡಿಸಿದ್ದರು. ಅವರ ಪ್ರಕಾರ, RX100 ಹೆಸರನ್ನು ಹಾಗೆಯೇ ಇರಿಸಲಾಗಿದೆ. ಇದುವರೆಗೆ ಯಾವುದೇ ಮೋಟಾರ್‌ ಸೈಕಲ್‌ನಲ್ಲಿಯೂ ಈ ಹೆಸರನ್ನು ಬಳಸಲಾಗಿಲ್ಲ. ಕಂಪನಿಯು ಈ ಐಕಾನ್ ಹೆಸರಿನೊಂದಿಗೆ ಅದರ ಹಿಂದಿನ ವೈಭವವನ್ನು ಮರಳಿ ತರಲು ಯೋಜನೆ ಹೊಂದಿರುವುದರಿಂದಲೇ RX100 ಹೆಸರನ್ನು ಯಾವುದೇ ಮಾದರಿಗೆ ಇಟ್ಟಿರಲಿಲ್ಲ ಎಂದು ತಿಳಿಸಿದ್ದಾರೆ.
ಕಟ್ಟುನಿಟ್ಟಾದ BS6 ಹಂತ II ಹೊರಸೂಸುವಿಕೆಯ ಮಾನದಂಡಗಳ ಕಾರಣದಿಂದಾಗಿ ಯಮಹಾ RX100 ನ 2-ಸ್ಟ್ರೋಕ್ ಎಂಜಿನ್ ಅನ್ನು ಮರಳಿ ತರುವುದಿಲ್ಲ ಎಂಬುದು ಬಹಳ ಸ್ಪಷ್ಟವಾಗಿದೆ. ಆದರೆ ಈ ಬಾರಿ ಎಲ್ಲಾ ಮಾನದಂಡಗಳ ಪೂರೈಕೆಯೊಂದಿಗೆ ಯಮಹಾ RX100 ಅನ್ನು ಮರಳಿ ತರಲು ಸಜ್ಜಾಗಿರುವುದು ಸ್ಪಷ್ಟವಾಗಿದೆ. ಅವರು ಇತರ ಯಾವುದೇ ಉತ್ಪನ್ನದ ಮೇಲೆ ಆ ಸಾಂಪ್ರದಾಯಿಕ ಹೆಸರನ್ನು ಇಟ್ಟು ತಮ್ಮ ಜನಪ್ರಿಯತೆಯನ್ನು ಕಡಿಮೆಯಾಗಿಸಲು ಕಂಪನಿ ಸಿದ್ದವಾಗಿಲ್ಲ. ಹಾಗಾಗಿ ಪಕ್ಕಾ ಪ್ಲಾನ್ ಮಾಡಲಾಗುತ್ತಿದೆ.
ಹೊಸ RX100 ಡಿಸೈನ್ ಹಳೆಯದರಂತೆ ಕಾಣಬೇಕು, ನೋಡಲು ಸರಿಯೆನಿಸಬೇಕು, ಸರಿಯಾಗಿ ನಿರ್ವಹಿಸಬೇಕು ಎಂಬ ಎಲ್ಲಾ ವಿಷಯಗಳಲ್ಲಿ ಸೂಕ್ಷ್ಮವಾಗಿ ಪರಿಗಣಿಸಲಾಗುತ್ತಿದೆ ಎಂಬುದು ತಿಳಿದುಬಂದಿದೆ. ಜೊತೆಗೆ BS6 ಮಾನದಂಡಗಳ ಪ್ರಕಾರ ಹೊಸ ಯಮಹಾ RX100 ಗಾಗಿ ದೊಡ್ಡ ಎಂಜಿನ್ ಅನ್ನು ಪರಿಗಣಿಸಲಾಗುತ್ತಿದೆ ಎಂದು ಇತ್ತೀಚಿನ ವರದಿಯು ಬಹಿರಂಗಪಡಿಸಿದೆ. ಏಕೆಂದರೆ ಅವರು ಆಧುನಿಕ 100cc ಎಂಜಿನ್‌ನಿಂದ ಹಳೆಯ RX100 ಮಟ್ಟದ ಕಾರ್ಯಕ್ಷಮತೆಯನ್ನು ಮರುಸೃಷ್ಟಿಸಲು ಸಾಧ್ಯವಿಲ್ಲ.
ಅದರ ವಿನ್ಯಾಸ, ಧ್ವನಿ ಮತ್ತು ಕಾರ್ಯಕ್ಷಮತೆಯಿಂದಾಗಿ RX100 ಭಾರತೀಯರಲ್ಲಿ ಬಲವಾದ ಭಾವನೆಯನ್ನು ಹೊಂದಿದೆ ಎಂದು ಯಮಹಾ ಇಂಡಿಯಾ ಚೇರ್ಮನ್ ಹೇಳಿದ್ದಾರೆ. ಇವುಗಳ ಸಂಯೋಜನೆಯು ಒಂದು ಕಾಲದಲ್ಲಿ ಉತ್ಸಾಹವನ್ನು ಉಂಟುಮಾಡಿತ್ತು. ಹಳೆಯ RX100 ಬೈಕಿನ ಅನುಭವ ತರಲು ಹೊಸ ಮಾದರಿಗೆ ಸಾಕಷ್ಟು ಕಾರ್ಯಕ್ಷಮತೆಯನ್ನು ನೀಡಬೇಕಾಗುತ್ತದೆ. ಹಾಗಾಗಿ ದೊಡ್ಡ ಸ್ಥಳಾಂತರ ಎಂಜಿನ್ ಮೂಲಕ ಅದೇ ಪರಿಣಾಮವನ್ನು ಸೃಷ್ಟಿಸುತ್ತದೆ ಎಂದು ಅವರು ಬಹಿರಂಗಪಡಿಸಿದರು.
ರಾಯಲ್ ಎನ್‌ಫೀಲ್ಡ್ ವಿರುದ್ಧ ಸ್ಪರ್ಧಿಸುವ ನಿರೀಕ್ಷೆಯಿದೆ:
ಮುಂಬರುವ Yamaha RX100 100cc ಎಂಜಿನ್ ಹೊಂದಿರುವುದಿಲ್ಲ. ಮುಂಬರುವ RX ಮೋಟಾರ್‌ಸೈಕಲ್‌ಗೆ ಯಾವ ಎಂಜಿನ್ ಅನ್ನು ತಯಾರಿಸಬಹುದು ಎಂಬುದು ಇನ್ನೂ ತಿಳಿದಿಲ್ಲ. ನಮ್ಮ ಪ್ರಕಾರ RX100 ನ ಅದೇ ನೋಟದೊಂದಿಗೆ ಆಧುನಿಕ 300cc ನಿಂದ 350cc ಎಂಜಿನ್‌ನೊಂದಿಗೆ, ಇದು ರಾಯಲ್ ಎನ್‌ಫೀಲ್ಡ್ ಮೋಟಾರ್‌ಸೈಕಲ್‌ಗಳ ವಿರುದ್ಧ ಸ್ಪರ್ಧಿಸುವ ನಿರೀಕ್ಷೆಯಿದೆ. RX100 ಈ ಹಿಂದೆ ರಾಯಲ್ ಎನ್‌ಫೀಲ್ಡ್ ಮೋಟಾರ್‌ ಸೈಕಲ್‌ಗಳಿಗಿಂತ ಹೆಚ್ಚಿನ ಪರ್ಫಾಮೆನ್ಸ್ ತೋರಿದ್ದವು. ಹಾಗಾಗಿ ಮುಂಬರುವ RX300 ಅಥವಾ RX350 ಮಾರುಕಟ್ಟೆಯಲ್ಲಿ ಇನ್ನಷ್ಟು ನಿರೀಕ್ಷೆಗಳನ್ನು ಹುಟ್ಟುಹಾಕಬಹುದು. ಆದರೆ ಯಮಹಾ ಏನೇ ಮಾಡಿದರೂ ಅದು 2026 ಅಥವಾ ಆನಂತರವೇ ಸಿದ್ಧವಾಗಲಿದೆ ಎಂಬುದು ಖಚಿತವಾಗಿದೆ.
ಇದೀಗ ಹೊಸತನದೊಂದಿಗೆ ಯಮಹಾ RX100 ಮಾರುಕಟ್ಟೆಗೆ ಬರಲು ಸಿದ್ಧವಾಗಿದ್ದು, ಗ್ರಾಹಕರಲ್ಲಿ ನಿರೀಕ್ಷೆಯನ್ನು ಹೆಚ್ಚಿಸಿದೆ.
