ಖಾಸಗಿ ವೃತ್ತಿಯಲ್ಲಿದ್ದರೂ ನಿವೃತ್ತಿ ಬಳಿಕ ಸಿಗಲಿದೆ ಪೆನ್ಷನ್ – ತಿಂಗಳಿಗೆ ಎಷ್ಟು ಪಿಂಚಣಿ ಸಿಗಲಿದೆ? ಅರ್ಜಿ ಸಲ್ಲಿಕೆ ಹೇಗೆ? ಪೂರ್ಣ ವಿವರ ಇಲ್ಲಿದೆ..

ನ್ಯೂಸ್ ಆ್ಯರೋ : ಸರ್ಕಾರಿ ಉದ್ಯೋಗಿಗಳಿಗಾದರೆ ನಿವೃತ್ತಿ ಬಳಿ ಕಡ್ಡಾಯವಾಗಿ ಪಿಂಚಣಿ ಸಿಗುತ್ತದೆ. ಆದರೆ, ಅಸಂಘಟಿತ ವಲಯದ ನೌಕರರು ತಮ್ಮ ನಿವೃತ್ತಿ ಜೀವನದ ಬಗ್ಗೆ ಹೆಚ್ಚು ಚಿಂತಿತರಾಗಿರುತ್ತಾರೆ. ಖಾಸಗಿ ಉದ್ಯೋಗ ಅಥವಾ ಸಣ್ಣ ವ್ಯಾಪಾರ ಹೊಂದಿರುವವರು ವೃದ್ಧಾಪ್ಯದ ಖರ್ಚುಗಳ ಬಗ್ಗೆ ಚಿಂತಿತರಾಗಿದ್ದಾರೆ. ನೀವು ಕೂಡ ನಿವೃತ್ತಿಯ ನಂತರ ಪಿಂಚಣಿಪಡೆಯುವ ಬಗ್ಗೆ ಯೋಚಿಸುತ್ತಿದ್ದರೆ, ‘ಅಟಲ್ ಪಿಂಚಣಿ ಯೋಜನೆ ನಿಮಗೆ ಉತ್ತಮ ಆಯ್ಕೆಯಾಗಿದೆ. ಈ ಯೋಜನೆ ಕುರಿತ ಪೂರ್ಣ ವಿವರ ಇಲ್ಲಿದೆ.

ಏನಿದು ಅಟಲ್ ಪಿಂಚಣಿ ಯೋಜನೆ?

ಕಡಿಮೆ ಹೂಡಿಕೆಯಲ್ಲಿ ಪಿಂಚಣಿಯನ್ನು ಖಾತರಿಪಡಿಸಲು ಅಟಲ್ ಯೋಜನೆಯು ಉತ್ತಮ ಆಯ್ಕೆ ಆಗಿದೆ. ಪ್ರಸ್ತುತ, ಅಟಲ್ ಪಿಂಚಣಿ ಯೋಜನೆ ಅಡಿಯಲ್ಲಿ, ಸರ್ಕಾರವು 60 ವರ್ಷಗಳ ನಂತರ ತಿಂಗಳಿಗೆ 1000 ರಿಂದ 5000 ರೂಪಾಯಿಗಳ ಪಿಂಚಣಿಯನ್ನು ಖಾತರಿಪಡಿಸುತ್ತದೆ. ಅಂದರೆ, ವಾರ್ಷಿಕ 60,000 ರೂಪಾಯಿ ಪಿಂಚಣಿ ಪಡೆಯುತ್ತೀರಿ. ಪತಿ ಮತ್ತು ಪತ್ನಿ ಹೂಡಿಕೆ ಮಾಡುತ್ತಿದ್ದರೆ ಇಬ್ಬರೂ ಸಹ ಪಿಂಚಣಿ ಪಡೆಯಬಹುದು. ಅಂದರೆ 10 ಸಾವಿರ ರೂಪಾಯಿ ಹೂಡಿಕೆ ಮಾಡಿದರೆ ವಾರ್ಷಿಕ 1,20,000 ಮತ್ತು ಮಾಸಿಕ 10,000 ಪಿಂಚಣಿ ಸಿಗುತ್ತದೆ. ಸರ್ಕಾರದ ಈ ಯೋಜನೆಯಲ್ಲಿ 40 ವರ್ಷದೊಳಗಿನವರು ಅರ್ಜಿ ಸಲ್ಲಿಸಬಹುದು.

60ರ ನಂತರ ವಾರ್ಷಿಕ 60,000 ರೂ.ಪಿಂಚಣಿ

ಅಟಲ್ ಪಿಂಚಣಿ ಯೋಜನೆಯ ಉದ್ದೇಶವು ಪ್ರತಿಯೊಂದು ವಿಭಾಗವನ್ನು ಪಿಂಚಣಿ ವ್ಯಾಪ್ತಿಗೆ ತರುವುದು. ಆದಾಗ್ಯೂ, ಪಿಂಚಣಿ ನಿಧಿ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ (ಪಿಎಫ್‌ಆರ್‌ಡಿಎ) ಅಟಲ್ ಪಿಂಚಣಿ ಯೋಜನೆ (ಎಪಿವೈ) ಅಡಿಯಲ್ಲಿ ಗರಿಷ್ಠ ವಯಸ್ಸನ್ನು ಹೆಚ್ಚಿಸಲು ಸರ್ಕಾರಕ್ಕೆ ಶಿಫಾರಸು ಮಾಡಿದೆ. ಹಾಗೇ ಯೋಜನೆಯಡಿ, ನಿವೃತ್ತಿಯ ನಂತರ, ಪ್ರತಿ ತಿಂಗಳು ಖಾತೆಗೆ ನಿಗಧಿತ ಮೊತ್ತ ಪಾವತಿಸಿದ ನಂತರ, ಮಾಸಿಕ 1 ಸಾವಿರದಿಂದ 5 ಸಾವಿರ ಪಿಂಚಣಿ ಲಭ್ಯವಿರುತ್ತದೆ. ಪ್ರತಿ 6 ತಿಂಗಳಿಗೆ ಕೇವಲ 1,239 ರೂಪಾಯಿಗಳನ್ನು ಹೂಡಿಕೆ ಮಾಡಿದ ನಂತರ 60 ವರ್ಷಗಳ ನಂತರ ವಾರ್ಷಿಕವಾಗಿ 60,000 ರೂಪಾಯಿಗಳ ಜೀವಿತಾವಧಿಯ ಪಿಂಚಣಿ ತಿಂಗಳಿಗೆ 5000 ರೂಪಾಯಿಗಳ ಖಾತರಿಯನ್ನು ಸರ್ಕಾರ ನೀಡುತ್ತಿದೆ.

5000 ಪಿಂಚಣಿ ಪಡೆಯಲು ಪ್ರತಿ ತಿಂಗಳು 210 ರೂ. ಪಾವತಿಸಬೇಕು

ಪ್ರಸ್ತುತ ನಿಯಮಗಳ ಪ್ರಕಾರ, ನಿವೃತ್ತಿ ನಂತರ ಪ್ರತಿ ತಿಂಗಳು 5000 ರೂ. ಪಿಂಚಣಿ ಪಡೆಯಬೇಕೆಂದರೆ, ನೀವೀಗ 18 ವರ್ಷ ವಯಸ್ಸಿನವರಾದರೆ, ಪ್ರತಿ ತಿಂಗಳು 210 ರೂ. ಪಾವತಿಸಬೇಕು. ಇದೇ ಹಣವನ್ನು ಮೂರು ತಿಂಗಳಿಗೊಮ್ಮೆ ನೀಡಿದರೆ 626 ರೂ. ಪಾವತಿಸಬೇಕು. ಆರು ತಿಂಗಳಿಗೊಮ್ಮೆ 1,239 ರೂ. ತಿಂಗಳಿಗೆ 1,000 ರೂಪಾಯಿ ಪಿಂಚಣಿ ಪಡೆಯಲು, ನೀವು 18 ನೇ ವಯಸ್ಸಿನಲ್ಲಿ ಹೂಡಿಕೆ ಮಾಡಿದರೆ, ನೀವು ತಿಂಗಳಿಗೆ 42 ರೂ. ಪಾವತಿಸಬೇಕಾಗುತ್ತದೆ.

ಅಟಲ್ ಪಿಂಚಣಿ ಯೋಜನೆಗೆ ಅರ್ಹತೆ‌ ಏನು?

ಅಟಲ್ ಪಿಂಚಣಿ ಯೋಜನೆಯಿಂದ ಪ್ರಯೋಜನಗಳನ್ನು ಪಡೆಯಲು, ನೀವು ಈ ಕೆಳಗಿನ ಅರ್ಹತೆಗಳನ್ನು ಹೊಂದಿರಬೇಕು.

• ಭಾರತದ ಪ್ರಜೆಯಾಗಿರಬೇಕು.
• 18-40 ವರ್ಷದೊಳಗಿನವರಾಗಿರಬೇಕು
• ಕನಿಷ್ಠ 20 ವರ್ಷಗಳವರೆಗೆ ಕೊಡುಗೆ ನೀಡಬೇಕು.
• ನಿಮ್ಮ ಆಧಾರ್‌ನೊಂದಿಗೆ ಲಿಂಕ್ ಮಾಡಲಾದ ಬ್ಯಾಂಕ್ ಖಾತೆ ಹೊಂದಿರಬೇಕು.
• ಮಾನ್ಯವಾದ ಮೊಬೈಲ್ ಸಂಖ್ಯೆ ಹೊಂದಿರಬೇಕು.
• ಸ್ವಾವಲಂಬನ್ ಯೋಜನೆಯ ಪ್ರಯೋಜನಗಳನ್ನು ಪಡೆಯುತ್ತಿರುವವರು ಸ್ವಯಂಚಾಲಿತವಾಗಿ ಅಟಲ್ ಪಿಂಚಣಿ ಯೋಜನೆಗೆ ಮೈಗ್ರೇಟ್‌ ಆಗುತ್ತಾರೆ.

ಯೋಜನೆಗೆ ಅರ್ಜಿ ಸಲ್ಲಿಸುವುದು ಹೇಗೆ?

• ಈ ಹಂತಗಳನ್ನು ಅನುಸರಿಸುವ ಮೂಲಕ APY ಯ ಪ್ರಯೋಜನ ಪಡೆಯಬಹುದು.
• ಎಲ್ಲಾ ರಾಷ್ಟ್ರೀಕೃತ ಬ್ಯಾಂಕ್‌ಗಳು ಯೋಜನೆಯನ್ನು ಒದಗಿಸುತ್ತವೆ. ನಿಮ್ಮ APY ಖಾತೆಯನ್ನು ಪ್ರಾರಂಭಿಸಲು ನೀವು ಈ ಯಾವುದೇ ಬ್ಯಾಂಕ್‌ ಶಾಖೆಗಳಿಗೆ ಭೇಟಿ ನೀಡಬಹುದು.
• ಅಟಲ್ ಪಿಂಚಣಿ ಯೋಜನೆಯ ಅರ್ಜಿ ನಮೂನೆಗಳು ಆನ್‌ಲೈನ್ ಮತ್ತು ಬ್ಯಾಂಕ್‌ನಲ್ಲಿ ಲಭ್ಯವಿದೆ. ನೀವು ಅಧಿಕೃತ ವೆಬ್‌ಸೈಟ್‌ನಿಂದ ಫಾರ್ಮ್ ಅನ್ನು ಡೌನ್‌ಲೋಡ್ ಮಾಡಬಹುದು.
• ಫಾರ್ಮ್‌ಗಳು ಇಂಗ್ಲಿಷ್, ಹಿಂದಿ, ಬಾಂಗ್ಲಾ, ಗುಜರಾತಿ, ಕನ್ನಡ, ಮರಾಠಿ, ಒಡಿಯಾ, ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ಲಭ್ಯವಿದೆ.
• ಅರ್ಜಿ ನಮೂನೆಯನ್ನು ಭರ್ತಿ ಮಾಡಿ ಮತ್ತು ಅದನ್ನು ನಿಮ್ಮ ಬ್ಯಾಂಕ್‌ಗೆ ಸಲ್ಲಿಸಿ.
• ನೀವು ಈಗಾಗಲೇ ಬ್ಯಾಂಕ್‌ಗೆ ಒದಗಿಸಿಲ್ಲದಿದ್ದರೆ ಮಾನ್ಯವಾದ ಮೊಬೈಲ್ ಸಂಖ್ಯೆಯನ್ನು ಒದಗಿಸಿ.
• ನಿಮ್ಮ ಆಧಾರ್ ಕಾರ್ಡ್‌ನ ಫೋಟೋಕಾಪಿ ಸಲ್ಲಿಸಿ.
• ಅಪ್ಲಿಕೇಶನ್‌ನ ಅನುಮೋದನೆಯಾದ ನಂತರ ದೃಢೀಕರಣ ಸಂದೇಶ ಸ್ವೀಕರಿಸುತ್ತೀರಿ.

ಇನ್ನೂ ನೀವು ಕಂತು ಅಥವಾ ಹಣ ಪಾವತಿಸಲು ಮಾಸಿಕ, ತ್ರೈಮಾಸಿಕ ಅಥವಾ ಅರ್ಧ ವಾರ್ಷಿಕ ಹೂಡಿಕೆಗಾಗಿ 3 ರೀತಿಯ ಯೋಜನೆಗಳನ್ನು ಆಯ್ಕೆ ಮಾಡಬಹುದಾಗಿದ್ದು, ಆದಾಯ ತೆರಿಗೆಯ ಸೆಕ್ಷನ್ 80CCD ಅಡಿಯಲ್ಲಿ, ತೆರಿಗೆ ವಿನಾಯಿತಿ ಕೂಡ ಸಿಗಲಿದೆ. ಸದಸ್ಯರ ಹೆಸರಿನಲ್ಲಿ ಕೇವಲ ಖಾತೆ ತೆರೆಯಲಾಗುತ್ತದೆ. ಸದಸ್ಯನು 60 ವರ್ಷಕ್ಕಿಂತ ಮೊದಲು ಅಥವಾ ನಂತರ ಮರಣಹೊಂದಿದರೆ, ನಂತರ ಪಿಂಚಣಿ ಮೊತ್ತವನ್ನು ಹೆಂಡತಿಗೆ ಅಥವಾ ನಾಮಿನಿಗೆ ನೀಡಲಾಗುತ್ತದೆ. ಸದಸ್ಯ ಮತ್ತು ಪತ್ನಿ ಇಬ್ಬರೂ ಮೃತಪಟ್ಟರೆ, ನಾಮಿನಿಗೆ ಸರ್ಕಾರ ಪಿಂಚಣಿ ನೀಡುತ್ತದೆ.