ನ್ಯೂಸ್ ಆ್ಯರೋ : ವಾಟ್ಸ್‌ ಆ್ಯಪ್ ಮೂಲಕ ಇದೀಗ ವಂಚನೆಯ ಜಾಲ ತೆರೆದುಕೊಂಡಿದ್ದು, ಕುಟುಂಬ ಸದಸ್ಯರ ಹೆಸರನ್ನು ಹೇಳಿಕೊಂಡು ಜನರನ್ನು ತಮ್ಮ ಬಲೆಗೆ ಬೀಳಿಸುತ್ತಿದ್ದಾರೆ.’ದಿ ಇಂಡಿಪೆಂಡೆಂಟ್’ ನಲ್ಲಿ ಪ್ರಕಟವಾದ ವರದಿ ಪ್ರಕಾರ, ‘Hi Mum’ ಹೆಸರಿನ ಸ್ಕ್ಯಾಮ್ ಭಾರಿ ಚರ್ಚೆಯಲ್ಲಿದೆ. ಈ ಸ್ಕ್ಯಾಂ ಕಾರಣ ಆಸ್ಟ್ರೇಲಿಯಾದ ಸಾವಿರಾರು ಜನರು 2022ರಲ್ಲಿ $7 ಮಿಲಿಯನ್ ಅಂದರೆ, 57 ಕೋಟಿ ರೂ.ಗಳಿಗೂ ಅಧಿಕ ನಷ್ಟವನ್ನು ಅನುಭವಿಸಿದ್ದಾರೆ ಎನ್ನಲಾಗಿದೆ.
ಆಸ್ಟ್ರೇಲಿಯಾದ ಗ್ರಾಹಕ ಮತ್ತು ಪ್ರತಿಸ್ಪರ್ಧೆ ಆಯೋಗದ ಪ್ರಕಾರ, ಕಳೆದ 3 ತಿಂಗಳಿನಲ್ಲಿ ಈ ಸ್ಕ್ಯಾಮ್ ನಿಂದ ಪೀಡಿತರಾದವರ ಸಂಖ್ಯೆಯಲ್ಲಿ 10 ಪಟ್ಟು ಹೆಚ್ಚಳವಾಗಿದೆ ಎನ್ನಲಾಗಿದೆ.
‘Hi Mum’ ಹೇಗೆ ಕಾರ್ಯನಿರ್ವಹಿಸುತ್ತದೆ?
ಕುಟುಂಬದ ಓರ್ವ ಸದಸ್ಯ ಅಥವಾ ಸ್ನೇಹಿತರ ಹೆಸರಿನಲ್ಲಿ ಬರುವ ಒಂದು ಸಂದೇಶದ ಮೂಲಕ ಈ ಸ್ಕ್ಯಾಮ್ ಆರಂಭವಾಗುತ್ತದೆ. ಇದರಲ್ಲಿ ಅವರು ಮೊಬೈಲ್ ಕಳೆದುಕೊಂಡಿದ್ದಾರೆ ಅಥವಾ ಹಾಳಾಗಿದೆ ಎಂಬ ಸಂದೇಶವಿರುತ್ತದೆ.
ಸಂದೇಶ ಪಡೆದವರ ವಿಶ್ವಾಸವನ್ನು ಗಳಿಸಲು ವಂಚಕರು ಯಶಸ್ವಿಯಾದ ಬಳಿಕ ತಮಗೆ ಸಹಾಯದ ಅವಶ್ಯಕತೆ ಇದೆ ಎಂದು ಪೀಡಿತರಿಗೆ ಮನವರಿಕೆ ಮಾಡುತ್ತಾರೆ. ಬಹುತೇಕ ಪ್ರಕರಣಗಳಲ್ಲಿ ಈ ಸಹಾಯ ಹಣಕಾಸಿಗೆ ಸಂಬಂಧಿಸಿರುತ್ತದೆ. ತಮ್ಮ ಯಾವುದೋ ಓರ್ವ ಸಂಬಂಧಿಕ, ಕುಟುಂಬದ ಸದಸ್ಯ ಅಥವಾ ಗೆಳೆಯನಿಗೆ ಹಣಕಾಸಿನ ಅವಶ್ಯಕತೆ ಕಾರಣ ತಾವು ಧನ ಸಹಾಯ ಮಾಡುತ್ತಿದ್ದೇವೆ ಎಂದು ತಿಳಿದು ಬಳಕೆದಾರರು ಸಂಬಂಧಿಗಳ ರೂಪದಲ್ಲಿರುವ ವಂಚಕರಿಗೆ ಹಣ ಕಳುಹಿಸುತ್ತಾರೆ. ಆದರೆ ವಾಸ್ತವದಲ್ಲಿ ಅವರು ವಂಚನೆಗೆ ಗುರಿಯಾಗಿರುತ್ತಾರೆ.
ಆದರೆ, ಭಾರತದಲ್ಲಿ ಇದುವರೆಗೆ ಇಂತಹ ಯಾವುದೇ ಪ್ರಕರಣ ಬೆಳಕಿಗೆ ಬಂದಿಲ್ಲವಾದರೂ ಎಚ್ಚೆತ್ತುಕೊಳ್ಳುವುದು ಅವಶ್ಯಕವಾಗಿದೆ. ಏಕೆಂದರೆ, ಭಾರತದಲ್ಲಿಯೂ ಕೂಡ ಕಳೆದ ಕೆಲ ವರ್ಷಗಳಲ್ಲಿ ಸೈಬರ್ ವಂಚನೆಯ ಪ್ರಕರಣಗಳಲ್ಲಿ ಹೆಚ್ಚಳವಾಗಿದೆ. ಇತ್ತೀಚೆಗಷ್ಟೇ ದೆಹಲಿಯಲ್ಲಿ ವ್ಯಾಪಾರಿಯೊಬ್ಬರನ್ನು ಬಲೆಗೆ ಬೀಳಿಸಿ ವಂಚಕರು ₹50 ಲಕ್ಷ ಹಣವನ್ನು ದೋಚಿದ್ದಾರೆ.
ಸಿಮ್ ಸ್ವ್ಯಾಪಿಂಗ್, ಕ್ಯೂಆರ್ ಕೋಡ್ ಸ್ಕ್ಯಾಮ್ ಹಾಗೂ ಪಿಶಿಂಗ್ ಲಿಂಕ್ ನ ಹಲವು ಪ್ರಕರಣಗಳು ವೈರಲ್ ಆಗುತ್ತಿವೆ. ಇಂತಹ ಸೈಬರ್ ವಂಚನೆಯ ಪ್ರಕರಣಗಳಿಂದ ನಮ್ಮನ್ನು ನಾವು ಸುರಕ್ಷಿತವಾಗಿರಿಸಿಕೊಳ್ಳಬೇಕು.
