ಟ್ವಿಟರ್‌ನಲ್ಲಿ ಎಡಿಟ್ ಬಟನ್ ಫೀಚರ್ – ಎಡಿಟ್ ಬಟನ್ ಹೇಗೆ ಕಾರ್ಯಾಚರಿಸಲಿದೆ? ಇಲ್ಲಿದೆ ಮಾಹಿತಿ…

ನ್ಯೂಸ್ ಆ್ಯರೋ : ವಿಶ್ವದ ಜನಪ್ರಿಯ ಮೈಕ್ರೋಬ್ಲಾಗಿಂಗ್ ಪ್ಲಾಟ್‌ಫಾರ್ಮ್ ಟ್ವಿಟರ್ ನಲ್ಲಿ ಬಹು ಬೇಡಿಕೆಯ ಆಯ್ಕೆಯಾಗಿರುವ ‘Edit Tweet’ ವೈಶಿಷ್ಟ್ಯದ ಫೀಚರ್ ಅನ್ನು ಪರಿಚಯಿಸಿದ್ದು, ಟ್ವಿಟರ್‌ ಬಳಕೆದಾರರ ಬಹುದಿನಗಳ ಬೇಡಿಕೆಯನ್ನು ಈಡೇರಿಸಿದೆ.

ಈ ಹಿಂದೆ ಟ್ವಿಟ್ಟರ್ ಬಳಕೆದಾರರು ಪೋಸ್ಟ್ ಮಾಡಿದ ಯಾವುದೇ ಟ್ವೀಟ್ ಎಡಿಟ್ ಮಾಡಲು ಸಾಧ್ಯವಾಗುವುದಿಲ್ಲ. ಇದರಿಂದಾಗಿ, ಬಳಕೆದಾರರು ಪ್ರಕಟಿಸಿದ ಟ್ವೀಟ್‌ನಲ್ಲಿ ಏನಾದರೂ ತಪ್ಪುಗಳಿದ್ದರೆ ಆ ಟ್ವೀಟ್ ಅನ್ನು ಡಿಲೀಟ್ ಮಾಡಿ ಮತ್ತೊಮ್ಮೆ ಪೋಸ್ಟ್ ಮಾಡಬೇಕಾದ ಅವಶ್ಯಕತೆ ಇತ್ತು ಅಥವಾ ಶಾಶ್ವತವಾಗಿ ಆ ಟ್ವೀಟ್ ಅನ್ನು ಡಿಲೀಟ್ ಮಾಡಬೇಕಿತ್ತು.

ಇದೀಗ ಟ್ವೀಟ್ ಗಳನ್ನು ಎಡಿಟ್ ಮಾಡಬಹುದಾದ ವೈಶಿಷ್ಟ್ಯವು ದೊರೆತ್ತಿದ್ದು, ಈ ವೈಶಿಷ್ಟ್ಯವು ಪ್ರಕಟಿತ ಟ್ವೀಟ್ ಲೇಬಲ್, ಟೈಮ್‌ಸ್ಟ್ಯಾಂಪ್ ಮತ್ತು ಟ್ವೀಟ್ ಅನ್ನು ಎಡಿಟ್ ಮಾಡಲಾಗಿದೆ ಎಂದು ಸೂಚಿಸುವ ಮತ್ತು ಗುರುತಿಸುವ ಐಕಾನ್‌ಗಳನ್ನು ಹೊಂದಿದೆ. ಟ್ವೀಟ್ ಪ್ರಕಟಿಸಿದ ನಂತರ 30 ನಿಮಿಷಗಳವರೆಗೆ ಈ ಸೇವೆ ಲಭ್ಯವಿರಲಿದ್ದು, ಮೈಕ್ರೋಬ್ಲಾಗಿಂಗ್ ಪ್ಲಾಟ್‌ಫಾರ್ಮ್ ಮಾಹಿತಿಯನ್ನು ಹಂಚಿಕೊಳ್ಳುವ ವೇದಿಕೆಯಾಗಿ ಸರ್ಕಾರಗಳಿಂದ ವ್ಯಾಪಕವಾಗಿ ಅಂಗೀಕರಿಸಲ್ಪಟ್ಟ ನಂತರ ಟ್ವಿಟರ್ ಇದೀಗ ಬಳಕೆದಾರರಿಗೆ ಟ್ವೀಟ್‌ಗಳನ್ನು ಎಡಿಟ್ ಮಾಡುವ ಅವಕಾಶವನ್ನು ನೀಡಿದೆ.

ಇದು ಹೇಗೆ ಕೆಲಸ ಮಾಡುತ್ತದೆ?

ಈ ಎಡಿಟ್ ಬಟನ್, ಟ್ವೀಟ್ ಪ್ರಕಟಿಸಿದ ನಂತರ 30 ನಿಮಿಷಗಳವರೆಗೆ ಅಸ್ತಿತ್ವದಲ್ಲಿರುವ ಟ್ವೀಟ್‌ಗಳಿಗೆ ಬದಲಾವಣೆಗಳನ್ನು ಮಾಡಲು ಬಳಕೆದಾರರಿಗೆ ಅನುಮತಿಸುತ್ತದೆ. ಪ್ರಕಟಿತ ಟ್ವೀಟ್ ಲೇಬಲ್, ಟೈಮ್‌ಸ್ಟ್ಯಾಂಪ್ ಮತ್ತು ಟ್ವೀಟ್ ಅನ್ನು ಎಡಿಟ್ ಮಾಡಲಾಗಿದೆ ಎಂದು ಸೂಚಿಸುವ ಐಕಾನ್‌ಗಳಂತಹ ಗುರುತಿಸುವಿಕೆಗಳನ್ನು ಹೊಂದಿರುತ್ತದೆ. ಟ್ವಿಟರ್ ಬಳಕೆದಾರರು ಟ್ವೀಟ್ ಅನ್ನು ಕ್ಲಿಕ್ ಮಾಡಲು ಮತ್ತು ಮೂಲ ವಿಷಯಕ್ಕೆ ಮಾಡಿದ ಎಲ್ಲಾ ಬದಲಾವಣೆಗಳನ್ನು ನೋಡಲು ಸಾಧ್ಯವಾಗುತ್ತದೆ.

ಟ್ವಿಟರ್ 320 ಮಿಲಿಯನ್‌ಗಿಂತಲೂ ಹೆಚ್ಚು ಸಕ್ರಿಯ ಬಳಕೆದಾರರನ್ನು ಹೊಂದಿದೆ ಎಂದು ಅಂದಾಜಿಸಲಾಗಿದೆ. ಇಷ್ಟು ಜನಪ್ರಿಯ ವೇದಿಕೆಯಲ್ಲಿ ಪೋಸ್ಟ್‌ಗಳನ್ನು ಪ್ರಕಟಿಸಿದ ನಂತರ ಅವುಗಳನ್ನು ಸಂಪಾದಿಸಲು ಅಥವಾ ಎಡಿಟ್ ಮಾಡಲು ಅನುಮತಿಸುವ ವೈಶಿಷ್ಟ್ಯವನ್ನು ಸೇರಿಸಲು ಅನೇಕರು ಒತ್ತಾಯಿಸಿದ್ದಾರೆ. ಬಳಕೆದಾರರಿಂದ ಪುನರಾವರ್ತಿತ ವಿನಂತಿಗಳ ಹೊರತಾಗಿಯೂ, ಟ್ವಿಟರ್ ಅದನ್ನು ಮಾಡಲು ನಿರಾಕರಿಸಿತ್ತು.

ಈ ಕುರಿತು 2020 ರಲ್ಲಿ ಸಂದರ್ಶನವೊಂದರಲ್ಲಿ, ಆಗಿನ ಟ್ವಿಟರ್ ಸಿಇಒ ಜ್ಯಾಕ್ ಡೋರ್ಸೆ ಕಂಪನಿಯು ಬಹುಶಃ ಎಂದಿಗೂ ಟ್ವೀಟ್ ಎಡಿಟ್ ವೈಶಿಷ್ಟ್ಯವನ್ನು ಸೇರಿಸುವುದಿಲ್ಲ ಎಂದು ಹೇಳಿದ್ದರು. ಏಕೆಂದರೆ ಅದು ತಪ್ಪು ಮಾಹಿತಿಯ ಹರಡುವಿಕೆಗೆ ಸಹಾಯ ಮಾಡುತ್ತದೆ ಎಂದು ಹೇಳಿದ್ದರು. ಆದರೆ ಇತರರು ಹೇಳಿಕೆಗಳನ್ನು ಮರುಟ್ವೀಟ್ ಮಾಡಿದ ನಂತರ ಅಥವಾ ಅನುಮೋದಿಸಿದ ನಂತರ ಅದನ್ನು ಬದಲಾಯಿಸಲು “ಟ್ವಿಟ್ ಎಡಿಟ್” ಬಟನ್ ಅನ್ನು ಬಳಸಬಹುದು ಎಂದು ಕೆಲವು ಟೆಕ್ ತಜ್ಞರು ಎಚ್ಚರಿಸಿದ್ದರು.

ಯಾರು ಟ್ವೀಟ್ ಎಡಿಟ್ ಮಾಡಬಹುದು?

ಟ್ವೀಟ್ ಎಡಿಟ್ ಬಟನ್ ವೈಶಿಷ್ಟ್ಯವನ್ನು ಪ್ರಾಯೋಗಿಕವಾಗಿ ಮೊದಲಿಗೆ ಬ್ಲೂ ಟಿಕ್ ಬಳಕೆದಾರಿಗೆ ಮಾತ್ರವೇ ಪರಿಚಯಿಸಲಾಗಿದೆ. ಟ್ವಿಟರ್ ಬ್ಲೂಗಾಗಿ ತಿಂಗಳಿಗೆ $4.99 ಪಾವತಿಸುವ ಚಂದಾದಾರರು ತಮ್ಮ ಟ್ವೀಟ್‌ಗಳನ್ನು ಪ್ರಕಟಿಸಿದ 30 ನಿಮಿಷಗಳಲ್ಲಿ “ಕೆಲವು ಬಾರಿ” ಸಂಪಾದಿಸಲು ಸಾಧ್ಯವಾಗುತ್ತದೆ ಎಂದು ಟ್ವಿಟರ್ ತಿಳಿಸಿದೆ. ಇದರ ಜೊತೆಗೆ ಟ್ವೀಟ್‌ಗಳನ್ನು ಪರಿಶೀಲಿಸಿ ಪ್ರಕಟಿಸುವ ಅಥವಾ ಅನ್‌ಡು ಮಾಡುವ ಅವಕಾಶವು ಸಹ ದೊರೆತಿದೆ.