Viral Video : ಹೆಣ್ಣು ಮಕ್ಳೇ ಸ್ಟ್ರಾಂಗ್ ಗುರೂ – ಚಾಕು ಹಿಡಿದು ಬ್ಯಾಂಕ್ ಗೆ ನುಗ್ಗಿ ದರೋಡೆಗೆ ಯತ್ನಿಸಿದವನನ್ನು ಹಿಮ್ಮೆಟ್ಟಿಸಿದ ಮಹಿಳಾ ಬ್ಯಾಂಕ್ ಮ್ಯಾನೇಜರ್..!!

ನ್ಯೂಸ್‌ ಆ್ಯರೋ‌ : ಹೆಣ್ಣು ಮಕ್ಳೇ ಸ್ಟ್ರಾಂಗ್ ಗುರೂ ಅನ್ನೋ ಹಾಡಿನ ಸಾಲುಗಳು ಆಗಾಗ ನೆನಪಾಗೋದು ಹೆಣ್ಮಕ್ಳು ಧೈರ್ಯ ತೋರೋ ಘಟನೆಗಳು ನಡೆದಾಗ.‌ ಇದೀಗ ಅಂಥಾದ್ದೇ ಘಟನೆ ನಡೆದಿದ್ದು, ದರೋಡೆ ಮಾಡಲು ಚಾಕು ಹಿಡಿದಯ ಬ್ಯಾಂಕ್​ಗೆ ಬಂದವನನ್ನು ಅದೇ ಬ್ಯಾಂಕ್​​ನ ಮಹಿಳಾ ಮ್ಯಾನೇಜರ್​​ ಕಟ್ಟಿಂಗ್ ಫ್ಲೈಯರ್ ನಿಂದ ದಿಟ್ಟತನದಿಂದ ಎದುರಿಸಿ, ಹೆದರಿಸಿದ ಘಟನೆ ರಾಜಸ್ಥಾನದಿಂದ ವರದಿಯಾಗಿದೆ. ಘಟನೆಯ ವಿಡಿಯೊ ಸೋಷಿಯಲ್ ಮೀಡಿಯಾಗಳಲ್ಲಿ ವೈರಲ್ ಆಗುತ್ತಿದೆ.

ದರೋಡೆಕೋರನನ್ನು ಧೈರ್ಯದಿಂದ ಹಿಮ್ಮೆಟ್ಟಿಸಿದ ಮಹಿಳಾ ಮ್ಯಾನೇಜರ್​ ಪೂನಮ್ ಗುಪ್ತಾ ಎನ್ನಲಾಗಿದ್ದು, ಆಕೆಯನ್ನು ದುರ್ಗಿ ಎಂದೆಲ್ಲ ಹೊಗಳುತ್ತಿದ್ದಾರೆ. ಅಷ್ಟು ದೊಡ್ಡ ಚಾಕು ಹಿಡಿದು ಬಂದವನನ್ನು ಈಕೆ ಒಂದು ಕಟ್ಟಿಂಗ್ ಪ್ಲೈಯರ್​ ಹಿಡಿದು ಹೆದರಿಸಿದರಲ್ಲ ಎಂದು ಆಶ್ಚರ್ಯವನ್ನೂ ವ್ಯಕ್ತಪಡಿಸುತ್ತಿದ್ದಾರೆ.

ಏನಿದು ಘಟನೆ?

ವ್ಯಕ್ತಿಯೊಬ್ಬ ಮುಖಕ್ಕೆ, ತಲೆಗೆ ಬಟ್ಟೆ​ ಕಟ್ಟಿಕೊಂಡು ರಾಜಸ್ಥಾನದ ಮುರುಧಾರಾ ಗ್ರಾಮೀಣ ಬ್ಯಾಂಕ್​ನೊಳಗೆ ನುಸುಳುತ್ತಾನೆ. ಆತ ತನ್ನನ್ನು ತಾನು ಗ್ಯಾಂಗ್​ಸ್ಟರ್ ಲಾರೆನ್ಸ್ ಬಿಷ್ಣೋಯಿ ಕಡೆಯವನು ಎಂದು ಹೇಳಿಕೊಂಡು ದರೋಡೆಗೆ ಬಂದಿದ್ದ. ಕೈಯಲ್ಲಿ ದೊಡ್ಡದಾದ ಚಾಕುವೂ ಇತ್ತು. ಆತ ಬ್ಯಾಂಕ್​ಗೆ ಆಗಮಿಸುತ್ತಿದ್ದಂತೆ ಹೊರಗೆ ಗದ್ದಲ, ಗಲಾಟೆ ಏರ್ಪಟ್ಟಿತ್ತು.

ಗಲಾಟೆ ಕೇಳುತ್ತಿದ್ದಂತೆ ಕ್ಯಾಬಿನ್​ನಲ್ಲಿದ್ದ ಪೂನಮ್​ ಗುಪ್ತಾ ಹೊರಗೆ ಓಡಿ ಬಂದರು. ಆಗ ದರೋಡೆಕೋರ ಅವರ ಎದುರೂ ಚಾಕು ಹಿಡಿದ. ಆದರೆ ಆಕೆ ಧೈರ್ಯ ಕಳೆದುಕೊಳ್ಳಲಿಲ್ಲ. ‘ಇರುವ ಹಣವನ್ನೆಲ್ಲ ಕೊಟ್ಟುಬಿಡಿ’ ಎನ್ನುತ್ತ ಒಳಗಿನ ಕೋಣೆಗೆ ಹೋದ. ಅಲ್ಲಿಂದ ಹೊರಗೆ ಬರುತ್ತಿದ್ದಂತೆ ಬ್ಯಾಂಕ್​ ಸಿಬ್ಬಂದಿಯೊಬ್ಬರು ಆತನನ್ನು ಹಿಡಿಯಲು ಯತ್ನಿಸಿದರು. ಆಗ ತುಸು ತಳ್ಳಾಟ ನಡೆಯಿತು.

ಈ ವೇಳೆ ಅವನ ಜೇಬಿನಲ್ಲಿದ್ದ ಕಟ್ಟಿಂಗ್​ ಪ್ಲೈಯರ್ (ತಂತಿಗಳನ್ನೆಲ್ಲ ಕತ್ತರಿಸಲು ಬಳಸುವಇಕ್ಕಳ)​ ಕೆಳಕ್ಕೆ ಬಿತ್ತು. ಪೂನಮ್​ ಕ್ಷಣ ಮಾತ್ರದಲ್ಲಿ ಅದನ್ನೆತ್ತಿಕೊಂಡು ಆತನನ್ನು ಹೆದರಿಸಿದ್ದಾರೆ. ಅಷ್ಟರಲ್ಲಿ ಉಳಿದವರೂ ಒಟ್ಟಾಗಿ ಅವನನ್ನು ಓಡಿಸಿದ್ದಾರೆ. ಬ್ಯಾಂಕ್​​ನ ಮುಖ್ಯ ಬಾಗಿಲನ್ನು ಮುಚ್ಚಿ, ಪೊಲೀಸರಿಗೆ ಕರೆ ಮಾಡಿದ್ದಾರೆ. ಈ ದರೋಡೆಕೋರನ ಹೆಸರು ಲ್ಯಾವಿಶ್​ ಅರೋರಾ ಎನ್ನಲಾಗಿದ್ದು, ಸದ್ಯ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.